குஜராத் அணிக்கு எதிரான போட்டியில் சென்னை அணி டாஸ் வென்று பந்துவீச்சை தேர்வு செய்தது.
17வது சீசன் ஐபிஎல் கிரிக்கெட் தொடர் இறுதிக்கட்டத்தை எட்டியுள்ளது. இதுவரை 58 லீக் போட்டிகள் நடந்து முடிந்துள்ளன. கொல்கத்தா மற்றும் ராஜஸ்தான் அணிகள் கிட்டத்தட்ட பிளே ஆஃப் சுற்றுக்கான தகுதியை பெற்றுள்ளன. அடுத்த 2 இடங்களுக்கு ஐதராபாத், சென்னை, டெல்லி, லக்னோ இடையே கடும் போட்டி நிலவுகிறது. இந்த நிலையில், இன்று நடைபெறவுள்ள லீக் 59வது லீக் போட்டியில் சென்னை மற்றும் குஜராத் அணிகள் பலப்பரீட்சை நடத்தவுள்ளன. இந்த போட்டி அகமதாபாத்தில் உள்ள நரேந்திர மோடி மைதானத்தில் இரவு 7.30 மணிக்கு நடைபெறவுள்ளது.
சென்னை அணியை பொறுத்தவரையில் இதுவரை விளையாடியுள்ள 11 போட்டிகளில் 6 போட்டியில் வெற்றியும், 5 போட்டியில் தோல்வியும் அடைந்து புள்ளிப்பட்டியலில் 4வது இடத்தில் உள்ளது. இன்றைய போட்டியில் வெற்றி பெற்றால் புள்ளிப்பட்டியலில் 3வது இடத்திற்கு மீண்டும் செல்லும். இதேபோல் பிளே ஆஃப் சுற்றுக்கான வாய்ப்பு பிரகாசமாகும். ஆகையால் இன்றைய போட்டியில் எப்படியாவது வெற்றி பெற்றாக வேண்டும் என சென்னை அணி தீவிரம் காட்டும் என எதிர்ப்பார்க்கப்படுகிறது. இதேபோல் குஜராத் அணியை பொறுத்தவரையில் பிளே ஆஃப் சுற்றுக்கான வாய்ப்பை ஏற்கனவே இழந்துள்ளது. ஆகையால் இன்றைய போட்டி எந்தவித தாக்கத்தையும் ஏற்படுத்தாது. குஜராத் அணி இதுவரை விளையாடியுள்ள 11 போட்டிகளில் 4 போட்டிகளில் மட்டுமே வெற்றி பெற்று புள்ளிப்பட்டியலில் கடைசி இடத்தில் உள்ளது.
இப்போட்டியில் டாஸ் வென்ற சென்னை அணியின் கேப்டன் ருத்ராஜ் கெய்க்வாட் முதலில் பந்துவீச்சை தேர்வு செய்தார். இதனைத்தொடர்ந்து குஜராத் அணி முதலாவது பேட்டிங் விளையாடவுள்ளது. தொடக்க ஆட்டக்காரர்களாக சுப்மான் கில்லும் சாய் சுதர்சனும் களமிறங்கவுள்ளனர்.