அமைச்சரவையில் மாற்றம் இருக்கும்; ஆனால் எவருக்கும் ஏமாற்றம் இருக்காது என்று முதலமைச்சர் மு.க.ஸ்டாலின் தெரிவித்துள்ளார்.
சென்னை கொளத்தூரில் பல்வேறு நலத்திட்டப் பணிகளை முதல்வர் மு.க.ஸ்டாலின் இன்று தொடங்கி வைத்தார். பின்னர் செய்தியாளர்களை சந்தித்த அவரிடம் தமிழக அமைச்சரவையில் மாற்றம் தொடர்பான கேள்விக்கு விளக்கமளித்துள்ளார். அப்போது அமைச்சரவையில் கண்டிப்பாக மாற்றம் இருக்கும் எனக் குறிப்பிட்டுள்ளார். ஆனால் யாருக்கும் அது ஏமாற்றம் தராத வகையில் இருக்கும் எனவும் கூறினார்.
இதன் மூலம் அமைச்சர்கள் யாருக்கும் பதவி பறிப்பு இருக்காது என்றும், துறைகள் மாற்றப்படவே வாய்ப்புள்ளதாகவும் தெரிகிறது.
வெளிநாட்டு முதலீடுகள் குறித்து முதல்வர் மு.க.ஸ்டாலினிடம் எதிர்க்கட்சிகள் வெள்ளை அறிக்கை கோருவது பற்றி கேள்வி எழுப்பப்பட்டது. அதற்கு முதல்வர் ஸ்டாலின், “வெளிநாட்டு முதலீடுகள் குறித்து தொழில்துறை அமைச்சர் டி.ஆர்.பி.ராஜா ஏற்கெனவே தெளிவாக விளக்கம் அளித்துள்ளார். அதுவே வெள்ளை அறிக்கைதான். வெளிநாட்டு முதலீடுகள் எதுவும் ஏமாற்றும் திட்டங்கள் அல்ல. அதிமுக ஆட்சியில் வெள்ளை அறிக்கைகள் எப்படி இருந்தன என்பது எனக்குத் தெரியாதா!” என்றார்.
கொளத்தூர் பேரவைத் தொகுதியில் மேம்பாட்டுப் பணிகளை நேரில் ஆய்வு – முதலமைச்சர் மு.க.ஸ்டாலின்
முதலமைச்சரின் இந்த அறிவிப்பு விரைவில் அமைச்சரவை மாற்றத்திற்கான அறிவிப்பாக இருக்கலாம் என்று எதிர் பார்க்கப்படுகிறது.