சென்னை ராணுவ பயிற்சி அகாடமியில் நடைபெற்ற நிகழ்ச்சியில் த.வெ.க தலைவரும், நடிகருமான விஜய் பங்கேற்ற புகைப்படங்கள் இணையத்தில் வைரலாகி வருகின்றன.
நடிகர் விஜய், அண்மையில் தமிழக வெற்றிக்கழகம் என்ற அரசியல் கட்சியை தொடங்கினார். மேலும், முழு நேர அரசியலில் இறங்க திட்டமிட்டுள்ள அவர், திரைத்துறையியல் தனது இறுதிப்படமாக தளபதி 69-ல் நடிக்க உள்ளார். கேவிஎன் புரடொக்சன்ஸ் நிறுவனம் தயாராகவுள்ள இந்த படத்தை பிரபல இயக்குநர் ஹெச். வினோத் இயக்குகிறார். தளபதி 69′ படத்தில் பிரபல பாலிவுட் நடிகர் பாபி தியோல் வில்லனாக நடிக்க இருக்கிறார்.
இப்படத்தின் வாயிலாக 2வது முறையாக விஜய்க்கு ஜோடியாக பூஜா ஹெக்டே நடிக்கிறார். பிரகாஷ் ராஜ், நரேன், பிரியாமணி, இயக்குநர் கவுதம் மேனன், மமிதா பைஜு உள்ளிட்டோர் ‘தளபதி 69’ படத்தில் முக்கிய வேடங்களில் நடிக்கின்றனர். தளபதி 69 படத்தில், போலீஸ் அதிகாரியாக விஜய் நடிக்க இருப்பதாக கூறப்படுகிறது.
கதைப்படி போலீஸ் துறையில் இருந்து விலகி, அதனை தொடர்ந்து மீண்டும் பணியில் சேருவதை போன்று அவரின் கதாபாத்திரம் அமைக்கப்பட்டு இருப்பதாக தகவல்கள் வெளியாகியுள்ளது. தளபதி 69 படத்தின் ஷுட்டிங் விரைவில் துவங்கும் என எதிர்பார்க்கப்படுகிறது.
இந்த நிலையில், சென்னையில் உள்ள ராணுவ பயிற்சி அகாடமியில் ராணுவ அதிகாரிகளின் நிகழ்ச்சி ஒன்றில் தமிழக வெற்றிக் கழகத்தின் தலைவரும், நடிகருமான விஜய் கலந்துகொண்டுள்ளார். அவருடன் தளபதி 69 திரைப்படத்தின் இயக்குனர் எச்.வினோத்தும் இந்த நிகழ்ச்சியில் கலந்துகொண்டார். நடிகர் விஜய்யின் இந்த புகைப்படங்கள் தற்போது இணையத்தில் வைரல் ஆகி வருகிறது.