இருமொழி கொள்கையையே தமிழ்நாடு விரும்புகிறது என்று மத்திய அமைச்சர் தர்மேந்திர பிரதானுக்கு, பள்ளிக்கல்வித்துறை அமைச்சர் அன்பில் மகேஸ் பதிலடி கொடுத்துள்ளார்.
மத்திய கல்வித்துறை அமைச்சர் தர்மேந்திர பிரதானுக்கு பதில் அளித்து அமைச்சர் அன்பில் மகேஸ் பொய்யாமொழி வெளியிட்டுள்ள எக்ஸ் வலைதள பதிவில் , உடைபடாததை சரிசெய்யாதீர்கள், தமிழ்நாட்டின் கல்வி முறை வழங்குகிறது, புதிய கல்விக் கொள்கை சீர்குலைக்கிறது என்று காட்டமாக விமர்சித்துள்ளார். புதிய கல்விக்கொள்கை மற்றும் மொழிப்பிரச்சினையில் தமிழ்நாட்டின் நிலைப்பாட்டின் மீதான தாக்குதல் என்பது தவறாக வழிநடத்தலாகும் என்றும், இது தமிழ் மொழியைப் பற்றியது மட்டுமல்ல; இது பல தசாப்தங்களாக முயற்சிக்கப்பட்டு, சோதிக்கப்பட்டு, வெற்றிகரமாக நிரூபிக்கப்பட்ட ஒரு கல்வி முறையைப் பற்றியது என்றும் அமைச்சர் அன்பில் மகேஸ் தெரிவித்துள்ளார். தமிழ்நாட்டின் மாநில வாரியக் கல்வி முறை உயர்கல்வி மற்றும் வேலைவாய்ப்பில் தொடர்ந்து சில சிறந்த முடிவுகளை உருவாக்கியுள்ளதாக குறிப்பிட்டுள்ள அமைச்சர் அன்பில் மகேஸ், மனப்பாடம் செய்வதற்குப் பதிலாக கருத்து அடிப்படையிலான கற்றலில் கவனம் செலுத்துவது, இந்தியாவிலும் வெளிநாட்டிலும் தொழில்முறை துறைகளில் சிறந்து விளங்க தலைமுறை தலைமுறையாக மாணவர்களுக்கு அதிகாரம் அளித்துள்ளதாகவும் தெரிவித்துள்ளார்.
58,779 பள்ளிகளில் 1.09 கோடி மாணவர்கள் மாநில வாரியப் பள்ளிகளில் கல்வியைத் தொடரும் அதே வேளையில், 1,635 சிபிஎஸ்இ பள்ளிகளில் 15.2 லட்சம் மாணவர்கள் மட்டுமே படிப்பதாக கூறியுள்ள அமைச்சர் அன்பில் மகேஸ், எனவே தமிழக மக்கள் என்ன விரும்புகிறார்கள் என்பது மிகவும் தெளிவாகிறதாக குறிப்பிட்டுள்ளார். மேலும், சிலர் கூறுவதுபோல், மூன்றாம் மொழியைக் கற்க வேண்டும் என்ற உண்மையான தேவை இருந்திருந்தால், நம் மக்கள் ஏன் மாநில வாரியப் பள்ளிகளைத் தொடர்ந்து தேர்வு செய்கிறார்கள்? என கேள்வி எழுப்பியுள்ளார். மக்களின் விருப்பங்களைப் புரிந்துகொண்டு மதிப்போமாக என்றும் அமைச்சர் அன்பில் மகேஸ் வலியுறுத்தியுள்ளார்..
தமிழ் என்பது வெறும் ஒரு மொழி மட்டுமல்ல, இது நமது வேர்கள், வரலாறு மற்றும் மதிப்பீடுகள் உடனான ஒரு இணைப்பு என்றும் அமைச்சர் அன்பில் மகேஸ் நெகிழ்ச்சியுடன் குறிப்பிட்டுள்ளார். மேலும் தமிழக மாணவர்கள் ஏற்கனவே வலுவான இருமொழி அடித்தளத்துடன் சிறந்து விளங்கும்போது, தமிழ்நாட்டிற்கு கட்டாய மூன்றாம் மொழி தேவையில்லை என்றும் அவர் திட்டவட்டமாக கூறியுள்ளளார். தமிழ்நாட்டின் கல்வி முறை ஏற்கனவே சிறந்த தொழில் வல்லுநர்கள், சிந்தனையாளர்கள் மற்றும் கண்டுபிடிப்பாளர்களை உருவாக்கி வரும் நிலையில், ஏன் ஒரு மாற்றத்தை கட்டாயப்படுத்துகிறீர்கள் என்று மத்திய அரசுக்கு அமைச்சர் அன்பில் மகேஸ் கேள்வி எழுப்பியுள்ளார்.
தேசிய கல்விக் கொள்கையை விட சிறப்பாக செயல்படும் ஒன்றை அமைப்பை ஏன் சீர்குலைக்க வேண்டும்? இது மொழி பற்றியது மட்டுமல்ல – முடிவுகளை வழங்கும் கல்வி முறையைப் பாதுகாப்பது பற்றியது என்று அமைச்சர் அன்பில் மகேஸ் குறிப்பிட்டுள்ளார். தமிழ்நாடு தனது மாணவர்களுக்கு எது சிறந்தது என்பதில் சமரசம் செய்யாது என்று திட்டவட்டமாக தெரிவித்துள்ள அவர், சிறப்பை வழங்கும் ஒரு அமைப்பை சீர்குலைக்க வேண்டாம் என்றும் மத்திய அமைச்சர் தர்மேந்திர பிரதானை கேட்டுக்கொண்டுள்ளார்.