தமிழக வெற்றிக் கழகத்தின் கட்சி கொடி அறிமுக விழா ஆகஸ்ட் 22-ல் நடைபெற உள்ள நிலையில், அன்று காலை 9 மணிக்குள்ளாக கட்சிக்கொடியை பனையூரில் உள்ள தலைமை அலுவலகத்தில் ஏற்றுகிறார் தலைவர் விஜய்!
தமிழ் சினிமாவின் முன்னணி நடிகரான விஜய் கடந்த பிப்ரவரி – 2ஆம் தேதி தமிழக வெற்றிக் கழகம் என்ற புதிய அரசியல் கட்சியை தொடங்கியதன் மூலம் அரசியல் தலைவராகவும் மாறினார்.
புதிய கட்சியை அறிவித்தற்கு பிறகு இரண்டு கோடி உறுப்பினர்கள் இலக்கு, கட்சியின் கொடி அறிமுகம், கட்சியின் முதல் மாநாடு, தொகுதி வாரியாக பொறுப்பாளர்களின் நியமிப்பது உள்ளிட்ட பல்வேறு விஷயங்களில் விஜய் கவனம் செலுத்தி வருகிறார். அந்த வகையில். தமிழக வெற்றி கழகத்தின் அதிகாரப்பூர்வ கட்சி கொடியை ஆகஸ்ட் 22ஆம் தேதி விஜய் அறிமுகம் செய்ய உள்ளார்.
சென்னை பனையூரில் உள்ள தமிழக வெற்றிக் கழகத்தின் தலைமை அலுவலகத்தில் காலை 7 மணிக்கு மேலாக தொடங்கும் இந்த நிகழ்ச்சியில் 9 மணிக்குள்ளாக கட்சியின் கொடியை அங்கு அமைக்கப்பட்டுள்ள புதிய கம்பத்தில் ஏற்ற உள்ளார் விஜய்.
இந்த கொடி அறிமுக விழாவில் கட்சியின் மாவட்ட தலைவர்கள், செயற்குழு உறுப்பினர்கள், இளைஞர் அணி, தொண்டர் அணி, மகளிர் அணி, மாணவர் அணி உள்ளிட்ட அணி தலைவர்கள் மற்றும் முக்கிய பொறுப்பாளர்கள் என 200க்கும் மேற்பட்டோர் கலந்து கொள்ள உள்ளனர்.
செப்டம்பர் இறுதியில், தமிழக வெற்றிக் கழகத்தின் முதல் மாநாடு விக்கிரவாண்டியில் நடக்க இருப்பது கிட்டத்தட்ட உறுதியாகியுள்ள நிலையில், அதற்குள்ளாக கட்சியின் கொடியை தமிழகம் முழுவதும் பிரபலப்படுத்த கட்சி நிர்வாகம் முடிவு செய்துள்ளது.