ஆங்கில பாட வினாத்தாளில் குழப்பம் – எஸ்.எஸ்.எல்.சி மாணவர்கள் தவிப்பு..

10ம் வகுப்பு பொதுத்தேர்வில் ஆங்கில பாடத்தில் சில கேள்விகளில் குழப்பம் இருந்ததாகவும், அந்த வினாக்களுக்கு உரிய மதிப்பெண் வழங்கவேண்டும் என்றும் கோரிக்கைகள் எழுந்துள்ளது.

தமிழகத்தில் 10ம் வகுப்பு பொதுத்தேர்வு கடந்த 6-ந்தேதி தொடங்கி நடைபெற்று வருகிறது. மொழிப்பாடத் தேர்வுகள் முடிவடைந்துள்ள நிலையில், கடந்த 8ம் தேதி ஆங்கில பாட தேர்வு நடைபெற்றது. இந்த ஆங்கில தேர்வு வினாத்தாளில் சில கேள்விகள் தவறாக இருந்ததால், மாணவர்கள் குழப்பமடைந்ததாக கூறப்படுகிறது. அதாவது, 1 முதல் 6 வரையிலான கேள்விகளில் தலா 3 அருஞ்சொற்பொருள் அறிக, எதிர்ச்சொல் அறிக என்பதற்கு பதிலாக 6 கேள்விகளையும் அருஞ்சொற்பொருள் அறிக என்று குறிப்பிடப்பட்டிருந்தது. இதனால் மாணவர்கள் அவதி அடைந்ததாகவும், அதற்கு உரிய மதிப்பெண்களை வழங்க வேண்டும் என்று ஆசிரியர்கள் கோரிக்கை விடுத்துள்ளனர்.

இதுகுறித்து தமிழ்நாடு உயர்நிலை மேல்நிலைப்பள்ளி பட்டதாரி ஆசிரியர் கழக திருச்சி மாவட்ட செயலாளர் வே.குமார் விடுத்துள்ள அறிக்கையில், “ ஏப்ரல் 8 அன்று நடைபெற்ற எஸ்.எஸ்.எல்.சி. பொதுத்தேர்வில் ஆங்கில தேர்வுக்கான வினாத்தாளில் எதிர்ச்சொல் பிரிவில் வினா எண் 4, 5, 6 ஆகியவற்றுக்கு உரிய தலைப்பு வழங்கப்படவில்லை. மேலும் வினா எண்:28-ல் சாலை வரைபடத்தில் வழி அடைக்கப்பட்டுள்ளது. இது மாணவர்கள் மத்தியில் குழப்பத்தை ஏற்படுத்தி உள்ளது. இந்த தவறான வினாக்களுக்கு உரிய மதிப்பெண்களை வழங்க வேண்டும்” என்று கேட்டுக்கொண்டுள்ளார்.