சினிமாத் துறையை பொறுத்தவரை 2023 ஆம் ஆண்டு சிறப்பான ஆண்டாகவே அமைந்தது. இந்த ஆண்டும் பல பெரிய ஹீரோக்களின் திரைப்படங்கள் வசூலை வாரிக் குவித்துள்ளன. கூகுளில் ஒவ்வொரு ஆண்டும் அதிகப்படியாக தேடப்படும் ஹீரோக்களின் லிஸ்ட் வெளிவருவது வழக்கம். இந்த ஆண்டுக்கான டாப்5 கூகுளில் தேடப்பட்ட நடிகர்களின் விவரம் இதோ.
5. தனுஷ்
காதல் கொண்டேன், துள்ளுவதோ இளமை படங்களின் போது தன்னுடைய மெலிந்த தேகத்தாலும், தோற்றத்தாலும் விமர்சனங்களை எதிர்கொண்டவர் தான் தனுஷ். ஆனால் அதன் பின்பு தன்னை ஒரு நடிப்பு அசுரனாக ரசிகர்களின் மனதில் நீங்கா இடம் பிடித்தார். 
சமீபத்தில் வெளியான வாத்தி, திருச்சிற்றம்பலம் போன்ற படங்கள் அடுத்தடுத்து 100 கோடி வசூலைப் பெற்றன. அடுத்ததாக இவர் நடிப்பில் வெளியாக உள்ள “கேப்டன் மில்லர்” படத்திற்கும் மிகப்பெரிய எதிர்பார்ப்பு இருந்து வருகிறது. அதிக பொருட்செலவில் பிரமாண்டமாக உருவாகி வரும் இப்படம் தனுஷின் படங்களிலேயே அதிக வசூலைத் தட்டித் தூக்கும் எனவும் எதிர்பார்க்கப்படுகிறது.
4. பிரபாஸ்:
தெலுங்கு சினிமா நடிகரான பிரபாஸ் “பாகுபலி” படங்களின் வெற்றிக்கு பிறகு இந்தியா முழுவதும் பேசப்படும் நடிகராக மாறினார். இவர் நடிப்பில் வெளியான சாஹோ, ராதே ஷ்யாம், ஆதிபுருஷ் போன்ற படங்கள் தோல்வி படங்களாக அமைந்தன. 
இருப்பினும் கே.ஜி.எஃப் பட இயக்குனர் பிரசாந்த் நீலுடன் பிரபாஸ் இணைந்துள்ள “சலார்” படத்தின் மீதான எதிர்பார்ப்பு மிகப்பெரியது. நிச்சயமாக சலார் திரைப்படம் ஆயிரம் கோடி வசூலை அசால்டாக தட்டித் தூக்கும் வாய்ப்புகள் அதிகம் உள்ளது.
3. அல்லு அர்ஜுன்
ஸ்டைலிஷான தெலுங்கு நடிகர் அல்லு அர்ஜுன் கூகுளில் அதிகம் தேடப்பட்ட நடிகர்களில் மூன்றாவது இடத்தில் உள்ளார். இவர் நடிப்பில் வெளியான புஷ்பா திரைப்படம் பட்டி தொட்டி எங்கும் பட்டையைக் கிளப்பியது. இப்படத்திற்காக சிறந்த நடிகருக்கான தேசிய விருதையும் பெற்றார்.
இப்படத்திற்கு வட மாநிலங்களிலும் நல்ல வரவேற்பு கிடைத்தது. இதனால் புஷ்பா படத்தின் இரண்டாம் பாகத்திற்கும் மிகப்பெரிய எதிர்பார்ப்பு இருந்து வருகிறது. சமீபத்தில் வெளியான புஷ்பா 2 படத்தின் டீசர் ரசிகர்களிடையே பேராதரவைப் பெற்றுள்ளது.
2. ரஜினிகாந்த்
72 வயதை கடந்தும் இன்றும் ஓயாமல் உழைத்து வரும் கலைஞன் ரஜினிகாந்த். இவர் நடிப்பில் சமீபத்தில் வெளியான ஜெயிலர் படம் 605 கோடியை வசூலித்திருந்தது. அடுத்ததாக ரஜினி டி. ஜெ. ஞானவேல் இயக்கத்தில் “வேட்டையன்”, ஐஸ்வர்யா ரஜினிகாந்த் இயக்கத்தில் “லால் சலாம்” ஆகிய படங்கள் மிகப் பெரும் எதிர்பார்ப்புடன் உருவாகி வருகின்றன.
அடுத்ததாக லோகேஷ் கனகராஜ் இயக்கத்தில் தலைவர் 171 படத்தில் நடிப்பதற்கு ரஜினிகாந்த் கமிட்டாகியுள்ளார் என்பது குறிப்பிடத்தக்கது.
1. விஜய்
ஒவ்வொரு படத்திலும் தன்னை மெருகேற்றிக் கொண்டே செல்லும் நடிகர் விஜய் 2023 ஆம் ஆண்டின், கூகுளில் அதிகம் தேடப்பட்ட நடிகர்கள் லிஸ்டில் முதலிடத்தைப் பிடித்துள்ளார். உலக அளவில் விஜய் நடிக்கும் படங்கள் பாக்ஸ் ஆபீஸில் அடித்து நொறுக்குகின்றன. 
சமீபத்தில் லோகேஷ் கனகராஜ்-விஜய் கூட்டணியில் வெளியான லியோ படம் 627 கோடி வசூலித்து இண்டஸ்ட்ரி ஹிட் ஆகியுள்ளது. அடுத்ததாக வெங்கட் பிரபு இயக்கத்தில் தளபதி68 திரைப்படம் பரபரப்பாகத் தயாராகி வருகிறது. வரும் டிசம்பர் 31 அன்று இப்படத்தின் டைட்டில் மற்றும் பர்ஸ்ட் லுக் வீடியோ வெளியாகும் என்றும் எதிர்பார்க்கப்படுகிறது.