மாபெரும் வெற்றியை தேடி தந்த வாக்காளர்களுக்கு நன்றி- மு.க.ஸ்டாலின்
திமுக ஆட்சியை எடைபோடும் தேர்தலாக, இந்த இடைத்தேர்தல் இருக்கும் என கூறி வந்தேன் என முதலமைச்சர் மு.க.ஸ்டாலின் தெரிவித்துள்ளார்.
சென்னையில் செய்தியாளர்களிடம் பேசிய முதலமைச்சர் முக ஸ்டாலிம், ஈரோடு இடைத்தேர்தலில் வரலாற்று சிறப்பு மிக்க வெற்றி கிடைத்துள்ளது. திராவிட மாடல் ஆட்சி தொடர வேண்டும் என்று மக்கள் பெரும் ஆதரவு அளித்துள்ளனர். இடைத்தேர்தலில் ஈபிஎஸ்க்கு மக்கள் பாடம் புகட்டியுள்ளனர். பிரதமர் யார் என்பது கூட முக்கியமில்லை. யார் வந்துவிடக்கூடாது என்பதுதான் முக்கியம். நாடாளுமன்ற தேர்தலில் இதைவிட பெரிய வெற்றியை மக்கள் கொடுப்பார்கள்.
திமுக ஆட்சியை எடைபோடும் தேர்தலாக, இந்த இடைத்தேர்தல் இருக்கும் என கூறி வந்தேன். ஈரோடு கிழக்கு பரப்புரையில் எதிர்க்கட்சித் தலைவர் தன்னை மறந்து நாலாந்தர பேச்சாளரைப் போல் பேசிய பேச்சுக்கு மக்கள் நல்ல பாடத்தை வழங்கியிருக்கிறார்கள். மக்கள் நல்ல பதிலடி கொடுத்துள்ளனர்.
ஈவிகேஎஸ் இளங்கோவனுக்கு மாபெரும் வெற்றியை தேடி தந்த வாக்காள பெருமக்களுக்கு என் இதய பூர்வமான நன்றி. ஒரே ஒரு எய்ம்ஸ் மருத்துவமனையை அறிவித்துவிட்டு, நான்காண்டுகளுக்கு முன்னால் அடிக்கல் நாட்டிவிட்டு, இன்றுவரை ஒரு செங்கலுக்கு மேல் வைக்காமல் தமிழ்நாட்டைக் கேவலப்படுத்திக் கொண்டு இருக்கிறது. தமிழ்நாட்டைக் கேவலப்படுத்திக்கொண்டு இருக்கிறது பாஜக. திராவிட மாடல் ஆட்சி இன்னும் சிறப்போடு நடந்திட வேண்டும் என மக்கள் இந்த வெற்றியை அளித்திருக்கிறார்கள். ” எனக் கூறினார்.